Hirsmontag 2021: Schnitzelbänke für einmal ohne Gesang

hirsmontag2021_zvg.jpg
Motive der Zofinger Schnitzelbänke (v.l.): Peschtärzt, Hinterwäldler und Chlämmerlisäck. (Bilder: zvg)

Bünzli

Mer Bünzlis chönnes ned erzwenge
I dere Zyt euch Värsli z’brenge
Es wäri schön weder z’senge
de Fasnachtsvirus bliebt be eus wyterhin dene

D’Altstadtbewohner hend es neus Läbe
Niemer esch ede Stadt ond benemmt sech denäbe
Das tüend doch veli sehr begrüesse
Ond de Macrons-Schmid tuet neu Zofige versüesse

Das Gstörm wäg dem Böumli chönne mer ned verstoh
Ou d Stadt het sech kei Zit förs Behandle gno
Bluetbuecheholz sig doch guet zum Grilliere
So chönne d’Ausländerof eusne Füürstelle diniere

A de General-Guisan-Stross
hends umto veli alti Linde
Jetzt wörde Toureschte öisi Jugendherbärg besser finde
Met dem tüends nor eusi Jonge strofe
Jetzt müends halt neu em Parkhus em 2. UG go schlofe

Eusi Bouverwaltig chasch secher ned klone
Die wend jo öberall nor no 20er Zone
Ede Bouverwaltig ehre gröschti Stolz
Si händ Bluetbueche, Linde ond neu vom Ringier Holz

Mer Bünzlis send eus am öberlege
Öb mer ächt neu i Stadtrot wete
Mer send deför vo 7 of 5 Setz z’reduziere
5 Bünzli wörde länge zom das Städtli z’regiere

Das Gschtörm em wisse Huus vo Amerika
Das müesste mer em Zofiger Rothus gar ned ha
Es esch glich wär neu Zofige regiert
Typisch Zofige chli kariert

Busdepot, Bahnhof, Onderfüehrig we Kreisu tüends realisiere
Be de Fasnacht 2021 werd läider nüt passiere
Mer Bünzli hend probiert Värsli s’brönzle ohni z’singe
Ond wönsche euich alles Gueti ond tüend nüt erzwinge

Chlämmerlisäck

Mer unterhalte euch hött als hoch steriile Bank
Mit gnue Distanz bem Läse, wärde der jo ou ned krank
D’Chlämmerlisäck send froh, einisch nor chli z’schriibe
Zom Singe hätt vo eus sächs, eine müesse Deheime bliibe

Sed 50 Johr dörfe d’Froue die eiget Stimm abgäh
Nor d’Aargauerinne düend das nid so wörtlech näh
Dass es mit em Frauestimmrächt, im Aargau ned guet goht
Merkt Christiane Guyer, be de Wahle i Regierigsrot

Weder d’Mueter no de Vater triffsch Deheime a
Nur s’Chind das isch elei und het verschissni Windle a
D’Mueter macht Kariere, wird Diräkter wene Maa
Und de Vater, är macht Vaterschaftsurlaub z’Gran Canaria

D’Leitig vo de Spitex AG hets nonig rächt begriffe
Dass s’Personal i der Pause chum Zyt het zum go schiffe
Die sölle be de Kliänte no schnäll ofs WC goh
Denn die Zyt, die wird jo vo de Gmeinde übernoh

En rächte Saustall stinkt abartig und ou gruusig
Denn sälber gmachte Mischt isch meischtens luusig
Und wennt im eigne Mischt muesch ome wandle
Denn chas echs nur, om d’Staatsanwaltschaft handle

D’Peschtärzt

Hesch Quarantäne satt,
wotsch weder is normale Läbe zrogg,
machs ned wiä dä Zofiger e de nöchi vo de Wiggerebrogg,
met Spray ond Füürzüg got är e de Wohnig of läschtigi Mogge los,
är chond zwar us de eigene vier Wänd,
aber landet of de Stross

Ich lüüte zwösche zwöi Online-Meetings minere Chrankekasse a,
diä nätti Person det esch grad a de Ufzgi me erne Chender dra,
denn telefonier ich minere Versecherig,
es esch secher ned vermässe,
diä gueti Frou chönnt wenigstens am Telefon ufhöre Yogurt ässe,
mi Bankberoter lütet, nach 3 mol probiere ändlech zrögg,
är heig d’Wösch jetzt us em Chäller gholt, ich heig Glöck,
au mer händs Büro scho lang nöme gseh, schaffe vo dehei,
die Einzige em Büro, diä kontrolliere das – es esch d’Polizei

Scho vor Corona hets z’Zofige Beizer gä, jetz muesch lose,
diä händ eri Beize gwächslet wie eusereis d’Unterhose,
Au nach de Coronakrise gilt, diä nage ned am lääre Täller,
sie rotiere eifach i dene Beize es bezli schnäller.

Be dene schwiizerische Corona-Massnahme striites über Kompetänze,
Bondesrot, Parlament und Kanton
wänd alli e chli politisch glänze,
För de Zofiger-Stadtrot bliibe söttig grösseri Kompetänze en Troum,
sälber entscheide dörfe si höchstens über’s Schicksal vomene Boum.
Mer Pestärzt tüend jetzt sowieso em Motorhome wohne
Meh Zyt als dehei, verbrenge mer sowieso bald i der 20er Zone

Z’letsch het är de Stadtrot vo 7 of 5 wöue reduziere
Jetzt tuet sich de Hottiger säuber pensioniere
Mer händ kei Angst um ihn und fendes guet
Dass er Dank sine x Näbepöschte ned verlumpe tuet

S’BAG rotet, wenn de plötzlech niese muesch,
dass das gfälligst e din eigene Elleboge tuesch,
mer Peschtärzt send degäge, de Grund dä esch banal,
das neui britisch Virus chonnt jo über dä Ärmelkanal

Ig be e chline Golfball und rolle und rolle en Florida so vor me he,
Set de Trump weder me Zyt för me het, roll ig jetz dütlech meh,
doch ei Frog diä wäri no, es belaschtet mi und das vermehrt
wäreli wär vo üs beidne denne zerscht iiglochet werd?

Mer Peschtärzt rote witerhin sech a d’Hygienereglä zhalte,
Näb em Händwäsche ou möglichescht Abstand lo z’walte,
bliibet gsond ond nänd öppe mouou es Gläsli Wyy,
so send ehr am nöchste Hirsmäntig secher weder debii.

Schnoderbuebe

Bis Grimme hets Zwärgli, e Esu schiesst Goud,
S’Rompustötzli macht jagt of d’Prinzässin so houd,
För öis drü esch klar, das send Gschechte för Chend,
Söscht hätti de Trump anstatt Strou Goud im Grend.

E Jugendherbärg wär schön! D’ Musigschuel bruucht’s!
Die einte hend Freud ond di andere schluucht’s.
Gäb’s d’ Musigschuel nöm wärisch totau am Arsch!
Wär söscht blost de könftig im Stadtrot de Marsch?

E Bank esch zom Gruie, treffsch Lüüt oder sengsch.
E and’ri Bank hortet, was emmer du brengsch.
Öb Diamant, Franke, Rubin ond Saphir.
Ou Goud oder Söuber ond WC-Papiir.

De Trump muess jetz go ond nemmt ändlech de Huet!
Är suecht es neus Tschöppli. Nor: Was cha dä guet?
Vöu rede, nüüd mache, chli Schef si … Jo, Sie!
Dä chönnti baud z’ Zofige Stadtamme si!

Met Wattestäb gosch ned i Nase ond Ohr!
Bim Covid-Tescht chont das no hüüfiger vor.
Mer mache das andersch! ’s esch s Ghemniss vor Kruu!
Mer bohre mit Fenger ond teschte im Muu!

De Cedi esch Presi vor SP! Hurra!
E Haube! Mou ehrlech, meh esch ou ned dra!
Ou ander hend gwächslet, chasch auport vernäh.
Det het’s frösches Bluet ond ned Wermueths-Tröpf gä.

S Corona het färn ganz Italie versüücht.
Im Vatikan het’s Gottes Säge verschüücht.
Wär’s det igschleppt worde …! De reinscht Supergou!
Fascht au öber 70 ond Vorgschecht hend’s ou!

D’Hinterwäldler

Politisch korrekt so esch de ZSV,
diversity, inclusion und als CEO en Frou.
Rassestisches und diskriminierends tüend mer ned brenge,
trotzdem dörfe mer das Johr wäge Corona ned senge.
Als chline Wehrmuetstropf,
ässe mer halt en Mohrechopf.

En Sommernacht am Kanalweg, alli schlofe scho im Bett,
denn röckt d’Füürwehr a, met allem wo si het.
En Wohnig brönnt det liechterloh,
eine jagt met Spray ond Fürzüg en Mogge ond en Floh.
D’Wohnig esch total verbrönnt, är het kes dehei,
debi wär di Wohnig jetzt garantiert coronafrei.

Ade Parteiversammlig wäsche d’SP-Genosse eri Händ,
ond denn wähle si de Wermuthz om neue Präsident.
Am Obe gets en Party är chas chum erwarte,
alli send iglade z’Zofinge i sim Garte.
De chont sini Frou und seit em sali,
jetzt wäre mer gloub scho ali.

Sami-hlaus du guete Maa,
dörf ic- e -hli S-hoggi ha.
Du weis-h au das i-h Läb-hue-he mag,
drum gfallt mer halt dä -hlausetag.
So tönt das der Affe,
wenn me öberall tuet s’C abschaffe!

Wenn mini Hypothek abloufti de hani Schiss,
vor dem Gspröch be de Credit Suisse.
Jetzt esch das aber gar ned tragisch nämli locker nöi,
besch met em Bänker per DU und hüetisch zäme Söi.
Das Duzis esch praktisch zom erwähne,
nach dem Gspröch muesch zäme id Karantäne.

Es Chatzeläbe wörd mer schmöcke,
chli suufe und chli Fueter schlöcke.
Am Ranze legge und los Chöpfli streichle,
chli go spaziere und is Cheschtli seiche.
Weniger Stress,
hesch nor no ide RS.

Spitzesport esch e verockti Wält,
als Fuesballer verdienschen Huufe Gäld.
Als Schwenger gets nor en Chranz,
als Schifahrer en Medallie met Glanz.
Im Tennis hesch Sponsore ned z’knapp,
ond als Torner schlönds di ab.

Bünzli2021.jpg
Bünzli: Bluetbuecheholz sig doch guet zum Grilliere, so chönne d’Ausländer of eusne Füürstelle diniere. (Bild: Bünzli)
Ihr Eintrag wird nach einer Überprüfung online gestellt.
Keine Kommentare vorhanden
Heute auf zofingertagblatt.ch
Frage des Tages
Marktplatz
regiostellen.ch
avec Zofingen
Verkäufer/innen und Schichtführer/innen 100% , Mitarbeiter, Zofingen
agon-sports AG
Servicetechniker Fitnessgeräte, Mitarbeiter, Zofingen
agon-sports AG
Mitarbeiter Lager und Versand (m/w), Mitarbeiter, Zofingen
Abteilungsleiter/Produktionsle, Mitarbeiter,
Flury-Emch Gartenbau AG
Landschaftsgärtner vorarbeiter, Mitarbeiter,
Sanitär- / Heizungsinstallateu, Mitarbeiter,
regioimmo.ch
Abo-Service

Normal-Abo (e-Paper/Digital inkl.)

Schnupper-Abo / Probe-Abo

Digital-Abo

Leserangebote
Partner