Beliebtes Sujet am Hirsmontag 2025 war die neue Regierungsrätin Martina Bircher. Aber auch die Elterntaxis und das Kinderfest-Bankett bauten die Schnitzelbank-Cliquen in ihre Verse ein.

Damit es an der nächsten Fasnacht genügend Schnitzelbank-Sänger hat, führt die Zofinger Schnitzelbänkler-Vereinigung Anfang April einen «Wörkshop» durch.

D’Martina esch jetzt im Regierigsrot, autsch, autsch…
luege mer, wes det ere got, autsch autsch…
wehe se got metem Velo det he
flügt se uf d Schnore ond tuets sech weh
im Wenter esch das ned so schlau
s’ganze Gsecht esch grüen und blau

S Zooooofiger Oktoberfescht
för de neu Verastalter eschs en Tescht
wotsch det es Bierli bstelle
gots 1 Stund, bis sis äne Stelle
das chas doch eifach ned si
wotsch ouno es Poulet frässe
das chasch grad ganz vergässe
wels zwenig Personal het

S Spital esch jetzte doch verkouft
Aarau fendet, dass es nöme louft
die chönned das ned verstoh
dass es chönt besser wytergo
mer fendes aber en gueti Sach
set de Cedric es bobo ha
chan er ou uf Bade go
det chont är jo eigentlech här

S Fahrverbot het se messachtet
D’Frog esch, weme das betrachtet
wär doch dä blödi Boum ned gsi
wo se esch röckwärts dri
ond niemer hets doch dörfe wösse
wär tuet mech jetzt abschleppe
de Schindler het si chönne rette
do esch d’Rahela secher froh

D’Martina Bircher, die goht i der Politik ofs Ganze
Scho am erschte Tag nach Aarau flügt si ofe Ranze
Im KSA tüend d’Dökter sie genau analysiere
Diagnose heisst, mit somene Polschter cha nid vöu passiere

Ofem Bundesplatz do sprötze 26 Fontäne
Für jede Kanton eini, das mues me no erwähne
In Zofige het’s ou es Wasserspiel, und das us eigner Quelle
Bem Bahnhof seicht’s durab i d’Velopasserelle

Es betzli z’schnäu chli z’lang parkiere und scho hesch e Buess
Mir hend Euch jetzt e Tipp, was me degäge mache muess
Chasch ofem Zebrastreife haute, s’Trottoir ou blockiere
Seisch eifach sigsch es Elteretaxi de cha der nüt passiere​

S’Chinderfescht wird wiiterhin mit Manöver gmacht
Doch oms Bankett do gets am Obe, denn die grösser Schlacht
S’Ässe, d’Gläser und ou s’Besteck hendsi falsch bemässe
De Stadtrot mit de Ehregäscht het scho alles gfrässe

Die Gasse i der Altstadt ghöre nümme zu de beschte
Mit Rollstuhel und Rollator gönd’s die Bsetzi-Stei go teschte
De Hansumaa als Pfläschterer het en grosse Uftrag gwitteret
Doch die meischte Alte händ scho vor em Rundgang zitteret

Mer send gsond – ämu em Grosse und Ganze,
Leider gseht mers, mer händ efäng e Ranze,
Abneh chasch wenns ofem Teller emmer weniger hett,
Drom esst mer am beschte am Kinderfeschtbankett.

S Zofiger Tagblatt esch verchouft, d Drockerei scho lang verbii,
Au e de Ringgi louft s’letschte Heft vom Band, das esch es denne gsii,
Doch denk dra, wenn de s’nöchscht mou of de WC-Schössle tronsch,
Das esch de einzig Ort en Zofige wo met Druck no öppis ofs Papier bechonsch.

A de Olympiade en Paris händ Triathlete müesse, vo Afrika bis Auschtralie,
ehri Schwömmkünscht zeige e de Seine zwösche Abwasser ond Fäkalie,
Au de Powerman in Zofige chönnt so olympisch zom Triathlon mutiere,
Fürs Schwemme chönnt meh vom neue Becki i de Oftriger Kläralag profitiere.

Us Sicherheitsbedänke of de Stross wird künftig druf verzechtet,
ond Papiersammlig nöm dor d’Schüeler z Zofige verrechtet,
Neu gönd sie i de Stadt goge fötzele – onder öis und im Vertraue,
det fende sie au weniger so Heftli, voll vo blutte Froue.

Wenns of de Guisanstross ned wiitergoht,
Eschs, wöu e Linksabbieger vor de grüene Ample stoht,
Wenns we im Dütsche weder be rot no grüen wiitergoht,
Velech wärs besser wenn a gwössne Orte au ned nor d Ample goht.

Vo Zofige händ mer müesse vernäh,
es hegi weder Neuigkeite gäh.
Im Spital het me sech über en neui Chefin gfreut,
ou s’Musuem het weder eini gfonde erneut.
Beidi müend am Morge us em Bett,
wöu Zofige kei City Manager het.

Ich kenne de Käru, dä esch vo Wiege,
ond s’Zofige kenn i secher Miege.
Ich kenne de Houzbängu vo Brittnou,
ond Strängubach de Dragan und sini Frou.
Das get hondert Stotz ohni z’öbertriebe,
bem Unterschriftesammle muesch sälber unterschriebe.

Mer händs igseh, sesch leider wohr,
Aargouer Autofahrer send e grossi Gfohr.
Met AG-Schilder of de Autobahn,
händ kei ahnig ond öberhaupt kei Plan.
Dass mer üsi Würdi chöne wahre,
darf üses Auto neu selbstgstüret fahre.

Wenn de Trump nömm duet i de Welt umeprale,
ond Martina Bircher lehrt aständig Velo fahre.
Wenn de Aeschi nömm duet im Bundeshuus omeringe,
ond dä, tschuldigung das, Nemo cha schön senge.
Jo wenn das got, do wetti druf,
got ou d’Märthalle weder uf.

Get’s Zofige ächt gli scho nöm? Es werd jo aus verchouft.
S Spetau ond s Tagblatt, Drockerei, wenn das so wiiter louft,
Get’s nüd meh uf em Heitere ond s Chenderfäscht muess go.
Sogar de Niklaus Thut wot jetz vom Bronne abe cho.

Mer hend jetz d Tegermogg bi öis ond d Japanchäfer ou.
Ond met de Quaggamoschle send baud aui Seen vou.
Die mache oisi Schwiiz kapot! So cha’s ned wiitergo!
Mer froge d SVP: Worom hend ehr si ine glo!

In Zofige werd de Verchehr jetz Stross för Stross igschränkt.
So publiziert’s de Stadtrot, nor: Het dä das fertig dänkt?
So het sech de Verchehr massiv beruhigt ond was esch gscheh?
Jetz het s Spetau und d Villa kei Gebortsabteilig meh

In Zofige, du gloubsch es ned; get’s änguhafti Gschöpf.
Met nor Gedanke unschoudig ond rein i ehre Chöpf.
S esch wie im Paradis ond dass so bliibt, do wörde si,
Ganz säubschtlos, nor för öich, no einisch vier Johr Stadtröt si.

Vo Beiz zo Beiz ziehnd mer höt do – das bänkle esch kei Schläck
muesch seckle, senge, Bierli näh – ond scho besch weder wäg
För s’nöchschte Johr do wette mer – das hed mer do schiints so
en Äxtraspur das mer chönnd met – em Öutere-Taxi cho

Plagööri, Habasch, Bloschtisack – ou Löli & Halonggöb
Esu, Aff & blöde Siech – ond ou de Logihond
Die Schimpfwörter die send nömm in – de Duden tued erwäge
dass mer deför ond ab sofort – nor Donald Trump cha säge

De Aargou esch deför bekannt – mer meine do ned Socke
die feini Rüeblitorte eschs – wo eim zo öich tued locke
Doch set de letschte Wahle werd – die Torte nömm so gässe
wäg dere Frou Regierigsrot – werd Bircher-Müesli gfrässe